Æ Deins Awwskejnsgilld

Bemærk: Denne tekst er ikke korrekturlæst (endnu)!

Æ Dejn wa ve å blyw gammel å tratte,
å Folk mindt te no kund han tool å vær fri,
han håd tit læt æ Bøen i æ Skuel sed atte,
no såånst han et sjel å go te æ Ti.
De wa kywwsom, men hwa skuld en snåe gjø ve ham,
en kund da ett wal liifram sæj et tc ham,
men den Daw han gik å di fæk en ny,
da vild dæ blyw Glee ve di fliest i æ By.

Så hoor di en Daw, te ve Nyorstie
vild han søøg si Awwskejn å ha si Pension,
no kund di da så blyw ham ledde omsie,
de skuld han jo takkes for o en Fasoen.
Føst samlet di ind te en Awwskejnsgaww,
å en Fest mindt di å di wa nøj te å laww,
i æ Krowemands Sal stild di an te et Gilld,
å di kund så tejjn sæ å komm hwem dæ villd.

Æ Fest wa i Gong, å æ Præst goor en Tåål
om åld de di skyldt æ gammel Dejn,
hie sad jo så manne Kwinndfolk å Kåål,
dæ kund sæjj wos, hwa han håd betyj for æ Ejn.
De vild ett blyw nem å fo ham erstattet,
så døgti han wa å så høwt han wa skattet,
— di fæk såen å veed hwa æ Dejn wa vaer,
te ålder et Y ww i æ Sal wa taer!

så gik et mæ Kaffe å Tååler å Snak,
å faar di vest å wa æ Timer fløwwen,
så rejjst æ Dejn sæ for å sæj Tak.
Ja — hans Awwskejnsansøgning hååd han jo skrøwwen,
men atte åld de, han i Awten håd hoer,
vild han godt blyw ve ino nowwe Oer. —
— Dæ bløw stell i æ Sal, men henn i en Krog
bløw dæ mumlet: Han pudset wos liigodt den Slog!

Teksten forekommer i følgende publikationer:

Bøen å gammel Folk af Anton Berntsen (1937)

Udvalgte Jydske Digte 1948 - andet bind af Anton Berntsen (1949)

Udvalgte Jydske Digte 1968 af Anton Berntsen (1968)

Tilbage