Bemærk: Denne tekst er ikke korrekturlæst (endnu)!
I æ Owwemøll mol di æ Kjanner te Mjel,
de ska bruges te Menneskers Føø,
i æ Næjjemøll sawe di Graner te Fjel,
di ka bruges te Kjeest te di døø.
Æ Møllerswend fløjter å fylder æ Kwaen,
å æ Ørret slor op i æ Bæk,
æ Sneker han synger å hweede hans Jaen
ve en Kjest te den siist, dæ gik væk.
Let Mad ska vi ha i wo Mund å wo Maww,
å.en Kjest, næer wo LYW æ fåbi,
der æ nok å bestell te æ Kwaen å æ Saww,
å æ Møllbæk må dawwle heng i.
Ve æ Owwemøll er en så løste å læt,
den ka hopp som et rund Någgel Gåen,
ve æ Næjjemøll er en så kyw å så træt,
te den drowwne sæ sjel i æ Stråend.
Vi løwe wo Løwwnet så godt vi fåstoer,
de for Æænd, om æ Vej å æ long,
vil nowwe så spøør om, hwa Gawn vi fæk goer,
— vi holdt da æ Møllværk i Gong!
Teksten forekommer i følgende publikationer:
| Udvalgte Jydske Digte 1948 - første bind af Anton Berntsen (1949) |
| Udvalgte Jydske Digte 1968 af Anton Berntsen (1968) |
Copyright ISCA Software 2023-