Gammel å unng

Bemærk: Denne tekst er ikke korrekturlæst (endnu)!

VI gammel goe mjest å æ jawnhen trætt,
de æ kons så let, vi ino ka forrætt;
næer vi sier o di unng å hwa di ka majt,
så tænke vi: Ok ja, di unng di ka sajt!

Men vi hå jo osse engong wan unng,
vi ka howws, te wo Tanker wa somtie tunng;
dæ wa manne Moel, en så gjaan vild no,
dæ wa manne Ting, en kund slæt ett fåsto.

En gik å bløw kyw, for en wa jo så jenn,
en drømt om en Kjærrest, men hwoe æ hun henn?
En vild Øv en Bedrøwt, men hwodan kom i Gong,
de so ud te, æ Vej vild blyw trøkkwon å long.

Vi fand wos et Arrbed, vi fand wos en Mååg;
I unng sie teframm ad, vi kige tebååg.
Der æ nok, en ska sloos mej, den unng vil fo sett,
men bytt mæ vi gammel, de vil I ves ett!

Teksten forekommer i følgende publikationer:

De Fie Snees af Anton Berntsen (1953)

Tilbage