Ywl i Salling

Bemærk: Denne tekst er ikke korrekturlæst (endnu)!

Æ Sommer æ henn, å æ Oer gor o Held,
vi hå bøwwlet mæ Arrbed å tumlet mæ Gjæld,
æ, Smør koost få let, vi kund ett sææl wo Griis,
en sej gammel Kuw fæk vi sjel Low å spiis.
Men no vil vi ha wos en Festdaw ilywl,
—få no er et Ywl!

Vi hå vrøwwlet ve Møøder å skjændtes i Blåå,
den jenn gor te Løwn, hwa den anden Mand såå,
æ Kåålfolk hå truet, æ Kwinndfolk hå grædt,
vi vild te å ta sjel, om vi ett fæk wo Ræt.
Men no er et glemt, vi æ Venner ilywl,
få no er et Ywl!

Vi kam sjælden i Kjerk, æ Vej æ så long,
å vi tøtt de wa wal let, vi fæk få wo Gong,
æ Sææder æ hoor, å æ Dejn synge skidt,
de æ Præst håer å sæjj, hå han så wos så tit.
Men no ringer æ Klokke, vi kommer ilywl,
— få no er et Ywl!

1933

Teksten forekommer i følgende publikationer:

Bøen å gammel Folk af Anton Berntsen (1937)

Udvalgte Jydske Digte 1948 - andet bind af Anton Berntsen (1949)

Udvalgte Jydske Digte 1968 af Anton Berntsen (1968)

Tilbage