Bemærk: Denne tekst er ikke korrekturlæst (endnu)!
I trower ett a ka fo nowweting goer,
fåde a æ gammel å fatte,
— a ska sæjj jer nued te I ålde hå hoer,
om I hæjsen hå Stoond å hør atte.
A hå Tjennestfolk nok, å demm lær a sprinng,
såen æ Væjer æ ve å go fræ dem,
å nowwe a dem æ slæt ett så rinng,
a æ jawn godt fånøwet mæ dem.
Dæ legger en Bygning innd i æ By,
die sedde så manne å skrywe,
å nowwe hå travlt mæ no Swatt å no Bly,
hwa Hanndværk mon de æ di drywe?
De må ålldsammel arrbed få Gammel Mathis,
de knivve dem tit å blyw farre,
hwæ Daw ska di laww mæ en ny Avis,
å di ved, a vil ett læ mæ narre.
Hwæ evige Daw ka a stapp mi Piiv
mæ »Melange« fræ fremmet Lannd,
å de blywwe fragtet hæte mæ Skiiv,
dæ sejjler o stue Wannd.
Di komme mæ Kaffe å Te å Muskat
å Pevver å Kardemomm,
de æ liimøj -- næer Gammel Mathis vil ha't,
ska mi Tjennestfolk snåe læ et komm.
Mi Søn drow å te Amerika,
a hååd jo ett udden den jennest,
han er o en Farm innd ve Omaha,
die håe han en gue Tjennest.
Han skrywe te mæ om stuert å småt,
hwæ Monetsdaw høer a fræ ham,
å åldtie høer a, han håer et godt,
a æ swæer godt fånøwet mæ haml
Men næer han ska så ha æ Bræw send astæj,
må æ Lanndpost jo føst stek en te sæ,
å næer de hå rejst mæ æ Båån et Støk Vej,
må en Dampskivskaptejn pot en ve sæ.
Så sæje han: »Well, hier æ Bræw te Mathis,
så fyre vi under æ Kejl,
pas godt o, Folkens, vi ett fålis,
få de Bræw må ett wal go fejl l«
Så plasker æ Skruww å æ Skiv er i Gong,
så goer et som de wa smuer,
de wåer nowwe Daww, for æ Vej æ long,
så legger æ Bræw o mi Buer,
Såen hjelpe di te o hwæ si Mååd,
a foer æ Bræw den Daw a vindt en,
men hwa om en no ingen Tjennestfolk hååd,
å en sjel skuld derøwe å hindt en!
Mi Tjennestfolk, bådde dem hier i æ Land
å demm o di fremmet Stæjje,
di slidde hwæ Daw så godt di kan,
såen a ka go å ha et des bæjje.
Di for ingen Pension næer mi Løwwnet er æend,
men komme den Daw a ska fræ dem,
så sæjjer a Tak få den Ti vi wa kjæend,
a wa groww godt fånøwet mæ dem!
Teksten forekommer i følgende publikationer:
| Udvalgte Jydske Digte 1948 - andet bind af Anton Berntsen (1949) |
| Udvalgte Jydske Digte 1968 af Anton Berntsen (1968) |
Copyright ISCA Software 2023-