Wo gammel Dejn

Han wa som ander gammel Dejjn,
æ Læærdom wa et småt mej,
men han kund løøs å skryww å ræjjn,
å atten Bøen kåldt han si ejjn,
i de Støk wa han godt mej.
Hans Orgelspel wa vidt bekjæend,
han slow di kjønnest Triller,
å han kund løs te Buers så pæen,
næer Goormandsfolk holdt Gilder.

Et stue Skekk å Hoer så gro
hans gammel Howed krååndset,
han kund hold Styyr o stuer å smo,
å I ka trow, æ Tamp kund slo,
næer o en Røkk den dåånset.
Kund ett i Hast vi finnd wo Plads,
men gik å føld i Tanker,
så hoor vi ham roov: Fottevas!
- de lættet o æ Skanker!

Hans »Religion« wa nok let taer,
men den kund ha wan ringer,
æ Katekismus fæk vi laer,
å hwa den sande Trow wa vaer,
de kunnd vi o wo Finnger.
Han villd ett, vi skuld spilld wo Ti
mæ Gymnastik å Tejjning,
men Skrywwen øvet vi wos i,
å vi wa styww i Ræjjning.

Æ Skuel wa gammel, law å gro,
æ Bindingsværk wa sempel,
æ Fag wa fo, æ Tag wa Stro,
å no vild ingen byyj di smo
så rinng et Læærdoms Tempel.
Æ Kakkelown wa rø a Rost,
de lowt a sweede Huesse,
å dæ wa Fjettebrø å Wost
i ålld æ Melldmadspuesse.

Æ gammel Dejn gik i hans Graw,
æ Skuelstoww bløw kassieret,
den wa få snæwer å få law,
en ny, dæ swåer te Tidens Kraw,
æ Sowwnråd hå spendieret.
Di høer så møj no i æ Skuel
om fremmet Lannd å Stæjje,
let flie Konster læer di wol,
- hwem ved, om de æ bæjje?

Teksten forekommer i følgende publikationer:

Megstur af Anton Berntsen (1925)

Udvalgte Jydske Digte 1968 af Anton Berntsen (1968)

Tilbage