Bemærk: Denne tekst er ikke korrekturlæst (endnu)!
De æ godt å vær Høwwed ve Sommerdaww,
da foer en no Føø te en howwer,
æ Klævvermark æ som en Blomsterhaww,
den swottbroget Kuw stor å fylder si Maww
å hwister imelld ad æ Flowwer.
Æ Grejs i æ Tyyjerslaw ræjn en kons let,
de fålde dæ jawwnle en Klat i,
men die hwor æ Hjoordreng si Køll hå smet,
die stoe den kjønnest Tot den hå sjet,
å den wa nok vaer å fo fat i.
No gier en æ Tyyjer et ordenlig Røk,
de ska prøwwes om ett den ka no en,
si Bjeen sto te Strit, å æ Stååg foer en Nøk,
mon æ Tunng ett ka rækk de siist lille Støk?
— de wa Skåå — den kund liigodt ett fo en!
Den hå mjest Løst te de den hår undt ve å no,
men de sååm ka en sæjj om så manne;
de gue en håe en ett skjønner o,
å hwem vil fålanng, te en Kuw ska fåsto
å vær kloger o de end vi ande.
Teksten forekommer i følgende publikationer:
| Udvalgte Jydske Digte 1948 - andet bind af Anton Berntsen (1949) |
| Udvalgte Jydske Digte 1968 af Anton Berntsen (1968) |
Copyright ISCA Software 2023-